1 мин

UFC холбоо Тедди Ринерт 15 сая еврогийн мөнгө амалжээ

Японд бэлтгэл хийж байна.

М.Сугар-Эрдэнэ 2023.11.20

Жүдо бөхийн олимпын хошой, дэлхийн 11 удаагийн аварга, Францын тамирчин Тедди Ринер Японы Канагава мужийн Хирацүка хотод Токай их сургууль дээр хамтарсан бэлтгэлд оролцлоо.

Бэлтгэлийн дараа Тедди сэтгүүлчидтэй уулзаж, асуултад нь хариуллаа. Тэрээр “Мэргэжлийн бөх, америк хөлбөмбөг, холимог тулаанаас ч урилга хүлээн авч байлаа. Хамгийн сүүлд холимог тулааны UFC холбоо надад 15 сая еврогийн санал тавьсан” гэж хэлж, сэтгүүлчдийг шуугиулав.

Гэхдээ “Би жүдо бөхдөө л гол анхаарлаа хандуулах ёстой. Яагаад гэвэл жүдод анхааралгүй бол гэмтэл, бэртэл их авдаг. Цаашдаа яахыг мэдэхгүй ч одоо бол Парисын олимпод түрүүлэх гол зорилготой байгаа. Би ирэх жил 35 нас хүрнэ. Эх орондоо болж байгаа олимпын наадамд түрүүлнэ гэдэг хүний амьдралд ганц л тохиох явдал. Гэр бүл, найз нөхөд бүгд ирж үзэх нь дамжиггүй. 2028 оны олимпод ч оролцох хүсэл байна” гэж ярьсан юм.

Холимог тулааны талаар Теддигийн хэлж байсан үгсээс толилуулбал 2011 онд “Би холимог тулааныг спорт гэж боддоггүй. Энэ бол ямар ч үнэ цэнтэй зүйлгүй төрөл юм”, 2015 онд “Надад маш их мөнгө амалсан ч би холимог тулаанд татгалзсан хариу өгсөн. Яагаад гэвэл миний үнэт зүйлст тохирохгүй. Би тулаанчдыг хүндэтгэдэг ч хөл, гараар нүүр лүү цохих нь миний хийх ажил биш. ММА моодонд орж байгаа ч надад хамаагүй” гэж хэлж байв.